Profil Nagari SANTIAGO

Alhamdulilahirabbil Alamin, sagalo puji bagi Allah S.W.T nan alah sanantiaso mancurahkan sagalo nikmat kapado kito basamo di Nagari Sariak Alahan Tigo sahinggo kito lah bisa untuak mambangun nagari sasuai dengan keinginan kito basamo mulai dari niniak-niniak kito dahulunyo sampai kapado kito saat kini ko. Kamudian mari kito sananduangkan pulo sacaro basamo-samo salawat sarato salam kapado nabi kito tacinto yakni Nabi Muhammad S.A.W Allahumma Shalli Wasallam Waala Ali Wassallam, jo harapan khusuak dan tawadhuak basarato sagalo sifat nan tarpuji. Baliau handaknyo samakin hari samakin mambudayo di tangah-tangah masyarakaek Nagari Sariak Alahan tigo. Amin-amin yarabbal Alamin…….. Dalam kesempakatan kini ko izinkanlah kami menyampaikan ucapan tarimo kasih nan ndak tahinggo ateh bantuan disagalo bidang, lansuang ataupun ndak lansuang, sangajo ataupun ndak disangajo ado ataupun ndak ado nan dibarikan kapado kami dalam rangka untuak mamfasilitasi Blog nan ado ko yang ditujukan untuak kito basamo guno mampaarek tali silaturrahmi dan mampalanca pambangunan dinagari kito sarato pakambangan ilmu pangatahuan khususnyo. Yang mano pado zaman kini lo lah zaman millenium kecek urang. Sagalo nyo ado didalam ganggaman, eittssss… tapi jan sagalo nyo yang di ganggam yo ! beko kok taganggam di nan angek bedo kite. Hehe.. ^_^ Jadi kini sabalum kito malangkah labiah jauah sarancaknyo lah kito talabiah dahulu mangana nagari SANTIAGO (dima lataknyo, siapo sajo nan ado didalamnyo, baa bantuak nagari nyo, dan nan lain-lain). Beko kok lah jauah kaji padohal nan dasar indak tau, tu kok batanyo urang indak pandai pulo manjawek nyo. Malu lah kito jadinyo sabagai anak Nagari Sariak Alahan Tigo. Nagari SANTIAGO tapeknyo barado ditangah-tangah rimbo nan babatehan sabaliknyo jo parak-parak, samak-samak, batang aia, bukik-bukik, tapi untuak bahubungan jo urang lua lai ado jalan. Dan jalan tu lai lah balicinan dek pamarintah jo aspal walaupun masih ketek. Indak sarupo jo jalan dinagari urang nan lah dibuek babuek batingkek-tingkek tu balampu lo bagai. Kalau kito liek sacaro peta pamarintahan Nagari SANTIAGO ado babatehan jo nagari urang lain. Dimano sabalah kaateh nyo atau utara nan dinamoan urang babatehan jo Kecamatan Tigo Lurah, sabalah mudiak atau barat nan dikatoan urang babatehan jo Nagari Talang Babungo, sabalah kabawah nyo atau selatan nan dinamoan urang babatehan jo Kecamatan Pantai Cermin, dan disabalah ilia atau timur dan dinamoan urang babatehan jo Nagari Sungai Abu. Laweh nagari SANTIAGO yaitu sabanyak 10.200 Ha dan nagari kito barado pado katinggian 650 - 1450 mdpl dari parmukaan lauik dimano suhu rato-rato barado pado 18 - 〖24〗^0 C. SANTIAGO bajarak sakitar 100 Km dari ibukota propinsi nan mamakan wakatu tampuah sakitar 4 jam dan bajarak sakitar 65 Km dari ibukota Kabupaten nan mamakan wakatu tampuah sakitar sakitar 3 jam (itu alun masuak jam mancuci kendaraan kalo barado pado musim panghujan) hehehehe.. tapi kalau untuak ibukota Kecamatan lai bajarak 12 Km nyo dan itu bisa ditampuah dalam wakatu 45 minik dan indak paralu lo mancuci kandaraan do. Total jumlah panduduak dinagari SANTIAGO sawakatu dilakukan survei alakadarnyo pado tahun 2013 adolah sabanyak kurang labiah 6589 jiwa. Dimano tabagi kurang labiah 1525 KK, dimano total jumlah panduduak SANTIAGO 3358 padusi dan 3231 laki-laki. Kok nan barado diantaro kaduonyo ndak dietong karano itu adolah setan jo ubilih, kok nak maetong juo mako banyaklah panduduak nagari SANTIAGO deknyo, indak kasadang pariuak jo tungkunyo beko, jadi cukuik lah sagitu sajo… Kalau untuak hal-hal nan lain saparati pasa atau sikola, pasa dinagari SANTIAGO lah ado 3 buah pasa langang kini, nan mano pasa pasa sariak bawah pado hari sanayan, pasa sariak ateh pado hari rabu dan pasa talaok pado hari minggu (lah jaleh jo pasa langang urang saketek babuek lo pasa 3 buah mah, nan kakayo urang dimudiak juo nyo). Dan ditambah lo pasa tiok ari satiok jorong nan dijojoan dek tukang galeh. Dan dalam hal sikola dinagari lai alah ado banyak sikola mulai dari tingkek nan randah sampai kapado tingkek nan manangah, dimano ado 7 buah sikola dasar, 2 sikola manangah partamo, 3 sikola pasantren dan sabuah sikola managah ateh. Untuak tingkek nan tinggi alun ado lai karano masih banyak dosen nyo nan sadang sikola dilua nagari. Katonyo nanti kok lah tamek nyo akan babini jo balaki samo urang lua ditampek nan basinyal sahinggo bisa manalepon jo pak gubernur siap tu baru dikirim utusan kakampuang maota jo rang nan tingga mambicaroan baa kemajuan nagari ko. Untuak masalah pamarintahan itu cukuiklah pak wali jo pak presiden sajo yang mangatur, dari kami sakian sajo dulu. Untuak parkanalan awal blog ko dicukuikkan sajo sampai siko dulu, Jikok takurang atau talabiah kami minta maaf. Pado kasampatan barikuiknyo kami akan sambuang baliak. Mohon komentarnya dari semua pengunjung. Terima Kasih….